30. научный семінар карпаторусиністікы

    Середа 18. марца 2015 была присвячена юбілейному 30. научному семінару, якый в засїдалнї Consilium maius Ректорату Пряшівской універзіты традічно орґанізує Інштітут русиньского языка і културы ПУ в Пряшові.
   Семінар отворила ПгДр. Кветослава Копорова, ПгД., котра привітала участників і представила выступаючу проф. ПгДр. Юлію Дудашову-Крішшакову, Др. н., вызначну славістку, высокошкольску учітельку у функції професоркы, ґарантку докторандьского штудійного  проґраму  Славістіка – русиньскый язык і література.  Професорка Дудашова за свій професійный жывот была членков або ведучов многых рїшытельскых колектівів вызначных научных проєктів і членков научно-выскумных одборных орґанів, комісій, выборів і рад. Днесь є великым приносом про Інштітут русиньского языка і културы ПУ, нелем як довгорічна высокошкольска учітелька, але і як ерудована научна працовнічка з богатыма скушеностями і знанями.
     Выступаюча сі на семінар приправила лекцію на тему Місто русиньского языка в родинї славяньскых языків.  Тема лекції была повязана з єй недавнов великов роботов над моноґрафіов „Fonologický systém slovanských jazykov z typologického hľadiska“, в котрій є представленый ай русиньскый язык, як окремый мінорітный язык вєдно з далшыма славяньскыма языками (сербскым, хорватьскым, македоньскым...), котры ся наслїдком новой ґеополітічой сітуації поступно конштітуовали в новодобій Европі, але тыж языків, котры были в минулости з розлічных прічін мало вжываны (напр. білоруськый, кашубскый...). Фактічно в моноґрафії подала сінхронный опис фонолоґічных сістем ґенетічно прибузных языків (враховано русиньского). Такым способом описала фонолоґічны сістемы вшыткых сучасных славяньскых языків в сопоставлїню ід словацькому (як материньскому языку). Лекція о русиньскім языку в такім контекстї, як го представила професорка Дудашова выкликала много вопросів, якы участници семінаря в рамках діскузії мали можность положыти.
      На кінцю семінаря быв презентованый 6. зборник рефератів Studium Carpato-Ruthenorum за рік 2014. Презентаціов минулорічного зборника і ґратулаціов професорцї Дудашовій к вызначному жывотному юбілею быв семінар закінченый.
      К округлому юбілею сердечно ґратулуєме і жычіме много здоровя, щастя, успіхів в працовнім і особнім жывотї, а таксамо много енерґії до далшой творивой роботы. На многая і благая лїта, панї професорко!
Мґр. Зденка ЦІТРЯКОВА,
Інштітут русиньского языка і културы ПУ