День отвореных дверей на Пряшівскій універзітї

      11. і 14. септембра 2009 у Высокошкольскім ареалї Пряшівской універзіты (ПУ) в Пряшові быв 2. річник Дня отвореных дверей – презентації културы Русинів у вшыткых областях їх културно-сполоченьского жывота, котрый уж другый рік за собов орґанізовав Інштітут русиньского языка і културы той універзіты. І другый річник Дня отвореных дверей ся орґанізовав вдяка фінанчній помочі Міністерства културы СР ‒ проґраму Култура народностных меншын 2009, а того року фінанціями припомогла і ПУ. Цілём акції є інформовати штудентів середнїх школ о розлічных аспектах жывота і дїятельства Русинів на Словеньску і за граніцями СР, выкликати в них інтерес о русиньску културу, о навчаня русиньского языка, і такым способом находити потенціалных штудентів штудійного проґраму русинискый язык і література на ПУ.
     Зачаток другого річника належав народній співанцї: выступила знама інтерпретка русиньскых народных співанок Анна Порачова в допроводї гры на акордеонї Йозефа Пірога, котра зробила добру атмосферу у вступі до даной акції. Потім участників презентації привітала ПгДр. Анна Плїшкова, ПгД., директорка споминаного інштітуту, а о проєктї поінформовала притомных єй авторка – ПгДр. Кветослава Копорова з того же інштітуту.
     Обсягом тогорічной акції были выступлїня на дві главны темы. В рамках І. темы – Русиньскый списовный язык, русиньскы народностны орґанізації і інштітуції, школьска сфера, історія і набоженьскый жывот Русинів на Словеньску выступили: ПгДр. Анна ПЛЇШКОВА, ПгД., із рефератом Русиньскый списовный язык на Словеньску, ёго функціоналны сферы і можности высокошкольского штудія, ПгДр. Станїслав КОНЄЧНІ, к. н. із рефератом Русины в історічных переломах 2. тісячроча, ПгДр. Кветослава КОПОРОВА з рефератом Сполкы і орґанізації в русиньскім возроднім процесї, о. ТгЛіц. Франтїшек КРАЙНЯК із рефератом Русины в конфесіоналній сферї. О. Крайняк на тоту тему выступав 11. септембра а 14. септембра зась о. Мґр. Мілан ЯСИК.
     Друга тема ся дотыкала Русинів у міджінароднім контекстї, выдавательской роботы, театру і была представлена: Мґр. Александром ЗОЗУЛЯКОМ із рефератом Світовый конґрес Русинів і выдавательске дїятельство в русиньскім языку по роцї 1989, ПгДр. Маріёв МАЛЬЦОВСКОВ із рефератом Сучасна русиньска література і рефератом Мґр. Маріана МАРКА на тему Сучасный русиньскый професіоналный театер.
     К обидвом темам быв простор на діскузію, а то першый день зо штудентами Ґімназії Л. Штекела в Бардеёві, Ґімназії Т. Вансовой у Старій Любовнї і Споєной школы – Обходной академії у Свіднику, другый день – зо штудентами зо сниньской, гуменьской і лабірьской ґімназій.
     Треба повісти, же і на тогорічній акції понад 200 штудентів третїх річників середнїх школ дістало много новых інформацій о Русинах і о можностях штудованя русиньского языка і літературы в комбінації з іншыма предметами на Пряшівскій універзітї і в загранічу, з котрых віриме, же холем мала часть проявить в будучности інтерес о русиністіку і прийдуть єй штудовати на ПУ.
А. З., фоткы автора а К. Копоровой