Штуденты з Фрайбурґской універзіты у Фрайбурґу вєдно із професором Ахімом
Рабусом навщівили у пятніцю – 31. мая 2019 Інштітут русиньского языка і културы і
інтересовали ся о русиністічны штудії. Навщіва Пряшова была завершінём їх
тыжднёвого путованя по реґіонї, компактно заселенім Русинами. Цїлём той експедіції
было награваня діалектных текстів русиньского бісїдного языка. Фраґменты награтых
текстів ся стануть частёв проєкту корпусу русиньского бісїдного языка на інтернетї,
также каждый, хто буде мати інтерес, може єднотливы тексты находити як в писаній
подобі, так ай в подобі говореній. Тексты будуть управлёваны так, абы была захована
аноніміта інформаторів, котры были барз охотны, также штуденты были вдячны за
такый позітівный приступ к їх бадательскій роботї. Записовали тексты в селах Нова
Седліця, Убля і Колоніця в окресї Снина, а таксамо навщівили ай школу в Кленовій, де
ся выучує русиньскый язык. Провадником по реґіонї їм была докторандка Інштітуту
русиньского языка і културы Мґр. Зденка Цітрякова, котра вєдно з далшов
докторандков – Мґр. Міхалов Голубковов буде партіціповати на уведженім проєктї.
Віриме, же така сполупраца принесе позітівны выслїдкы у розвою, розшырёваню, але
передовшыткым у зміцнёваню статусу русиньского языка главнї меджі ёго носителями
– Русинами, і надїєме ся, выкліче інтерес о Русинів і о їх материньскый язык ай меджі
прислушниками іншых народів.

ПгДр. Кветослава Копорова, ПгД.