Презентація найновшых выдань русиньской літературы
споєна з громадов Сполку русиньскых писателїв Словеньска

27. марца 2012 ся о 9.00 год. в засїдалнї Consilium maius Ректорату Пряшівской універзіты в Пряшові одбыла презентація найновшых выдань русиньской літературы. Участь на нїй брали русиньскы писателї, працовници Інштітуту русиньского языка а културы Пряшівской універзіты (ІРЯК ПУ), штуденты, Русины і Нерусины і загранічны гостї. Презентація была споєна з річнов громадов Сполку русиньскых писателїв Словеньска (СРПС), котрый вєдно з ІРЯК ПУ были орґанізаторами той акції.

За великой участи ся презентація і громада зачала выступлїнём вызначной русиньской співачкы Марії Мачошковой. У вступі громады председкыня СРПС ПгДр. Кветослава Копорова привітала участників і представила далшый проґрам.

Зачала ся громада СРПС, в рамках котрой были оцїнены минулорічны прєкты і представлены приправлены проєкты до ґрантовой сістемы Уряду влады СР на тот рік. Далшым пунктом громады было приятя новой членкы до СРПС – ПгДр. Марты Беньковой, ПгД., котре одголосовали вшыткы участны членове сполку.

Наслїдовала презентація літературных творів приголошеных до Літературного конкурзу на Премію Марії Мальцовской і оцїнїня найлїпшых літературных творів. Квета Мороховічова Цвик была оцїнена 1. містом і сумов 400 €, 2. місце обсадив Осиф Кудзей (300 €) а 3. місце здобыла штудентка русиньского языка і літературы Петра Семанцова (200 €).

Наслїдно были представены книгы красной літературы, выданы в роцї 2011, і были прочінтаны їх рецензії. Як перша была прочітана рецензія Мґр. Іваны Джундовой, ПгД. на збірку поезії Юрка Харитуна – Мої сны. Друга нёв рецензована книжка была Углы погляду Миколая Ксеняка. Наслїдно свою рецензію прочітав доц. ПгДр. Андрій Антоняк, к. н., написану на поетічну збірку Осифа Кудзея – Кадило. Як послїдня была прочітана рецензія Мґр. Валерія Падяка, к. н. (без ёго участи) на дїтьску книжочку Камаратя спід зеленого дуба і белавого неба Кветы Мороховічовой Цвик, яку прочітала ПгДр. Кветослава Копорова.

По прочітаных реценріях слїдовала автоґраміяада авторів і было пририхтоване мале погощіня про вшыткых участників.

Зденка ЦІТРЯКОВА,

штудентка 3. річника ФГПН ПУ, комбінація русиньскый язык і література – вытварне уменя