В роцї 2023 вышла уж друга публікація творів Євґенія Фенцика, автора періоду русиньского народного оброджіня, котрого літературны творы суть меджі шыроков верейностёв мало знамы ай з прічіны, же много з творів автора было выданых лем за жывота писателя а пак уж нїґда веце.

Падяк-Павліч в мінулости уже выдали дакілько зборників творів писателїв періоду народного оброджіня, так само ся концентрують на выдаваня сценарів Театру Александра Духновіча в Пряшови, котрого многы сценарї были дотеперь лем в архіви.

Публікацію Євґеній Фенцик: Князь Корятовіч мож зарядити к пару років старій публікації выбраных текстів Анатолія Кралицького з підназвов Князь Лаборець. Книжка выдана в роцї 2023 презентує Фенцика як єдного із найплоднїшых писателїв народно-будительской літературы у карпатьскых Русинів в другій половінї 19. сторіча. В зборнику мож найти поетічны, прозаічны, драматічны, публіцістічны тексты а тыж і одборны старї занимаючі ся літературнов історіёв. Фенцик быв єдным з першых несловеньскых істориків словеньской літературы, котрій присвятів дві великы роботы (1892, 1899). Много з Фенциковых творів было дотеперь выданых лем за жывота автора і дякуючі тому, же быв редактором русиньского періодіка Листокъ, котре пропаґовало літературны творы русиньскых писателїв даной добы. По Фенциковой смерти в роцї 1903 быв автор на 120 років забытый і ёго творы были публікованы лем в рамках антолоґій або зборників, як фраґмент або скороченый текст.

Публікація Євґеній Фенцик. Князь Корятовіч собі найде много чітателїв головнї у шырокой одборной верейности, котра ся інтересує о русиньску літературу, а хосенна буде і про штудентів русиньского языка і літературы.

Публікація вышла з фінанчнов підпоров Фонду на підпору културы народностных меншын.