32. научный семінар карпаторусиністікы

Темов 32. семінара карпаторусиністікы, котрый в середу 11. новембра 2015 орґaнізовав Інштітут русиньского языка і културы Пряшівской універзіты, было Закарпатя по роцї 1991. З лекціов під назвов Сонда до минулости: Закарпатя в інтелектуалных діскурзах о Українї по роцї 1991 выступив доц. Володимир Фенич, к. н., декан факулты історії Ужгородьской народной універзіты.

На Ужгородьскій народній універзітї – Факултї історії пособить доц. Фенич як высокошкольскый педаґоґ і бадатель-історік од закінчіня своїх штудій. З ёго біоґрафії ся мож дізнати, же од року 1994, кідь наступив на Факулту історії до ашпірантуры, выступав на 71 научных конференціях. За 23 рокы научно-педаґоґічной роботы опубліковав 103 научных статей, з якых три вышли як моноґрафії. За свої бадательскы выслїдкы быв уже 14-раз оцїненый.

Семінар уж традічно отворила ПгДр. Кветослава Копорова, ПгД. представлїнём выступаючого. По лекції быв простор на діскузію, яку вывжыли переважно участници із Закарпатя, бо в проблематіцї суть лїпше зорьєнтованы. На конець семінара была презентація найновшых публікацій з области русиністікы. Свої публікації, котры даровав універзітній бібліотецї Пряшівской універзіты і Бібліотецї карпаторусиністікы при ІРЯК представив і доц. Фенич.

На закінчіня быв авізованый і далшый – в тім календарнім роцї послїднїй семінар карпаторусиністікы, котрый буде заміряный на русиньску літературу і театер. Выступаючім буде Мґр. Валерій Падяк, к.н. з Іштітуту русиньского языка і културы Пряшівской універзіты.

Мґр. Зденка Цітрякова,

інтерна докторандка ІРЯК-ПУ,

фоткы авторкы.