16. семінарь карпаторусиністікы 

25. мая 2011 у засїдалнї Consilium minus нового Ректорату Пряшівской універзіты на ул. 17. новембра ч. 15 Інштітут русиньского языка і културы ПУ зорґанізовав 16. Научный семінарь карпаторусиністікы, в рамках якого з рефератом на тему Формованя і розвой модерных русиньскых списовных мікроязыків выступив професор Нїредьгазькой высшой школы (Мадярьско) Др. Михаіл Капраль, к. н. Загранічный гость пряшівскій публіцї представив актуалну языкову сітуацію в русиньскій громадї Мадярьска призначну конкретныма кроками в процесї формованя реґіоналной нормы русиньского языка, якы суть слїдны главно в періодіку  Русиньскый світ, за языковый бік котрого одповідать якраз проф. Капраль. Реферуючій не обышов ани інформації о персоналных змінах, якы настали в послїднїм часї у веджіню Цїлорусиньской меншиновой самосправы Мадярьска, але тыж і в споминанім періодіку.

К реферату ся розвинула жыва діскусія, в якій  выступили: Мґр. Г. Бескид, проф. ПгДр. Ю. Дудашова, др. н., Ш. Крушко, Інж. Д. Крішко і др.

В проґрамі семінаря была і презентація найновшых выдань з карпаторусиністікы, главно выдань научных працовників Нїредьгазькой высшой школы: небогого проф. Др. Іштвана Удварія і проф. Др. М. Капраля, котры представила асістентка ІРЯК ПУ ПгДр. К. Копорова. Нас потїшыв главно перед місяцём выданый під редакціов М. Капраля букварь про русиньскых школярїв у Мадярьску („Русинськый букварь про школашув Мадярщины“) авторкы Маріяны А. Лявинець ‒ як єдна з публікацій готованых ку кодіфікації реґіоналной нормы списовного языка Русинів у Мадярьску.

А. З., фоткы автора