Перше засїданя обновленой языковой комісії

20. новембра 2015 ся в просторах ІРЯК ПУ одбыло перше засїданя узшого кругу языковой комісії в зложіню: проф. Осиф Сіпко, ПгД., доц. ПгДр. Василь Ябур, к.н.; доц. ПгДр. Юрко Панько, доц. ПгДр. Анна Плїшкова, ПгД.; ПгДр. Кветослава Копорова, ПгД.

Засїданя комісії реаґовало на заключіня міджінародного конґресу русиньского языка і першов стрїчов ся зачінать приправа матеріалів на корекцію в правилах правопису, якы будуть наслїдно настолены на засїданях шыршого кругу языковой комісії. Шыршый круг языковой комісії творять актівны хоснователї русиньского літературного языка в окремых сферах ёго фунґованя.

Были представлены першы пропозіції, як напр.: сколёваня в чуджіх і перевзятых назывниках; род в чуджіх і перевзятых назывниках: publikum – публіка, gymnázium –

ґімназія, múzeum – музей; die semmel – žemľa – землик і. т. п.; писаня мягкого знака в демінутівах і в назвах женьскых професій: кулька – кульцї, поштарька – поштарьцї; і др.); дакотры неясности в правописї префіксів роз-, рос-, без-, бес-, з-, с- (росказати – росказовати – розказ)...

До далшого засїданя, планованого на місяць марец 2016, членове комісії приправлять свої коментарї ід пропонованым змінам і приготовлять далшы матеріалы на корекцію правил правопису.

Мґр. Зденка ЦІТРЯКОВА,
інтерна докторандка ІРЯК ПУ,
фотка авторкы.