Studium Carpato-Ruthenorum

Лїтня школа русиньского языка і културы

14. 6. – 4. 7. 2010

Основны інформації:

Інштітут русиньского языка і културы Пряшівской універзіты в Пряшові (Словакія) орґанізує в часї од 14. 6. 2010 до 4. 7. 2010 першый річник Studium Carpato-Ruthenorum – меджінародной Лїтнёй школы русиньского языка і културы. Цїлём проєкту є здобытя, респектіве проглублїня комунікачной компетенції в русиньскім языку і росшырїня познаня в области карпаторусиньской історії і културы. Процес едукації на лїтнїй школї будуть забезпечовати высокошкольскы професоры, фундованы славісты і шпеціалісты в сферї карпаторусиністікы. Едукачный процес ся буде реалізовати паралелно в русиньскім і анґліцькім языку.

Лїтня школа є про:

• каждого, хто мать інтерес учіти ся русиньскый язык і ближше спознати історію і културу карпатьскых Русинів,
• Русинів з цїлого світа, котры ся хотять научіти по русиньскы і спознати край своїх предків,
• oсобы над 18 років.

Інтензівный курз русиньского языка i културы обсягує:

• 30 годин лекцій русиньского языка за три тыжднї, каждый день 2 годины в часї од 9.00 до 11.00 (лекції з русиньского языка і конверзації),

-     30 годин лекцій карпаторусиньской історії за три тыжднї, каждый день 2 годины в часї од 13:10 до 15.10,

• участници языковых лекцій будуть роздїлены до трёх ґруп; дві ґрупы, котрым будуть лекції чітаны в русиньскім языку, будуть роздїлены подля міры комунікації – зачаточници (комунікачна уровень А1, A2)  і покрочілы (комунікачна уровень Б1, Б2); третю ґрупу будуть творити зачаточници, котрым будуть лекції чітаны в  анґліцькім языку,
• участници собі можуть выбрати лекції з історії або в анґліцькім, або в русиньскім языку,
• на кінцї участници дістануть цертіфікат о абсолвованю Studium Carpato-Ruthenorum – лїтнёй школы русиньского языка і културы.

Културно-сполоченьскый проґрам обсягує:

• презентацію карпаторусиньскых традіцій, фолклору і културно-сполоченьского жывота Русинів у Словакії,
• презентацію карпаторусиньской народной архітектуры і културы, културно-історічных памяток,
• презентацію карпаторусиньской літературы, театру і філму,
• екскурзії в Пряшові, в околіцї Пряшова і в окремых реґіонах, де жыють Русины,
• културно-сполоченьскы акції.

Далшы інформації:

• Лїтня школа русиньского языка і културы ся одбуде в часї од 14. 6. 2010 до 4. 7. 2010 в Пряшові (Словакія) . За тоту добу будуть мати участници забезпечене уквартелёваня і стравованя (фрыштик, обід, вечеря).
• Цїна лїтнёй школы (лекції, културно-сполоченьскый проґрам, уквартелёваня, стравованя)  про єдну особу є 900 EUR.
• Дорогу до Пряшова і назад сі платять участници самы (найблизшый аеропорт є в містї Кошіцї, коло 35 км од Пряшова. Дале до Пряшова ся участници дістануть автобусом або влаком).
• Участници лїтнёй школы можуть пожадати од Інштітуту русиньского языка і културы ПУ штіпендію, котрa будe выбраным участникам одрахованa з цїны за лїтню школу. Условіом на здобытя штіпендії є послати окрем прыглашкы і мотівачне писмо (1 – 2 сторінкы), в котрім буде поясненый інтерес о школу і потреба штіпендії. Інформацію о придїлїню або непридїлїню штіпендії участник дістане писомнов формов. По завязнім приголошіню орґанізатор пошле каждому участникови конкретный тройтыжднёвый проґрам лїтнёй школы.
• Каждый, хто хоче быти участником першого річника Studium Carpato-Ruthenorum – Лїтнёй школы русиньского языка і културы, повинен послати приголошіня і мотівачне писмо найпізнїше до 1. 3. 2010 на адресу Інштітуту русиньского языка і културы ПУ.

Контакт:

Ústav rusínskeho jazyka a kultúry

PREŠOVSKÁ UNIVERZITA v PREŠOVE
Nam. legionárov 3
080 01 Prešov

Slovak Republic

tel.: +421 (51) 7720 392
e-mail: urjk@unipo.sk