35. научный семінар карпаторусиністікы

В середу 6. апріля 2016 ся одбыв уже 35. научный семінар карпаторусиністікы, якый орґанізує Інштітут русиньского языка і културы ПУ в Пряшові. Кідьже лекції на історічны темы зазнають в рамах семінара великый успіх, орґанізаторы знова анґажовали одборника на історію. Позваня тот раз прияв доц. Іґор Шніцер, к. н. з Каредры новодобой історії і історіоґрафії Ужгородьской народной універзіты. Доц. Шніцер сі приготовив лекцію на тему Мала война в марцу 1939 і зачаток другой світовой войны про підкарпатьскых Русинів.

Представлены были, як звычайно ай новы публікації з карпаторусиністікы. Были то  книжкы белетрістічного характеру Штефана Смолея – Білы марґареткы, Великый слюб і другы. І таксамо книжкы музичного характеру: Народны співанкы – автора Ш. Смолея, Koľadky - збірка духовных і світьскых колядок, зоставителём якой є Славомір Калиняк і книжка Ладїслава Мацка з авторьскыма співанками і нотовым записом. Авізованый быв і далшый семінар карпаторусиністікы приправлёваный на зачаток мая. Заміряный буде на область лінґвокултуролоґії, выступить на нїм проф. ПгДр. Йозеф Сіпко, к. н. з Філозофічной факулты ПУ.

Мґр. Зденка Цітрякова,

докторандка Центра языків і култур народностных меншын – Інштітуту русиньского языка і културы ПУ