В середу 16. децембра ся в засїдалнї ректорату одбыв остатнїй в тім роцї семінар карпаторусиністікы, орґанізованый на Пряшівскій універзітї Інштітутом русиньского языка і културы.

Семінар быв присвяченый історічно-літературній темі аматерьскых театрів на Підкарпатьскій Руси. Реферат мав приправленый Мґр. Валерій Падяк, к.н., історік літературы, выдаватель і робітник Інштітуту русиньского языка і културы, якый штудентам ІРЯК на ПУ чітать лекції з теоретічных дісціплин літературы, історії літературы і історії драматічной творчости Русинів.

Ёго лекція на семінарї несла назву Розвой аматерьского театра у карпатьскых Русинів в міджівойновім періодї і формованя народностного театра (1919 – 1938). Представив в нїй інтересны етапы русиньской театралной творчости з акцентом на міджівойновый період, котрый быв в русиньскім театралнім жывотї шпеціфічным і доста плодным.

Семінар уж традічно вела ПгДр. Кветослава Копорова, ПгД., котра представила дотеперїшню професійну роботу В. Падяка як выдавателя, орґанізатора недїльных школ на Закарпатю, но в першім рядї як науковця шырокого заміряня.

В рамках семінара были презентованы найновішы публікації з карпаторусиністікы, якы были в остатнїм часї выданы. Ішло о барз потрібну і довго обчековану другу часть Словеньско-русиньского словника доц. Юрія Панька, цїнну публікацію доц. ПгДр. Анны Плїшковой, ПгД, і ПгДр. Кветославы Копоровой, ПгД. - Русиньскый язык про чуджінцїв, выдану главно про потребы Міджінародной лїтнёй школы русиньского языка.

Выданы были і книжкы красной літературы і літературы про дїти. В тім чіслї вышли штири книжкы Гелены Ґіцовой-Міцовчіновой – Бескид нянько а Камяна мати, Просьбы і молитвы матери, Три раз гадай (ілустрована книжочка гаданок про дїти) і Школярик (поезія про дїти). Далшу ілустровану книжку про дїти під назвов З приповідкы світ написала Івета Мелнічакова, довгорічна учітелька русиньского языка в Міджілабірцях.

Мґр. Зденка Цітрякова,

інтерна докторандка ІРЯК-ПУ.