Одбыв ся 31. семінар карпаторусиністікы

В середу 21. октобра ся в засїдалнї Consilium maius Пряшівской універзіты одбыв далшый научный семінар карпаторусиністікы, якый уже по 31. раз орґанізовав Інштітут русиньского языка і култуты на ПУ.

На семінарї із своёв інтереснов лекціoв під назвов Перша світова война, Русины і взник Чеськословеньска в роцї 1918 выступив проф. ПгДр. Петер Шворц, к. н. з Катедры нововікой і найновічой словацькой історії Інштітуту історії Філозофічной факулты Пряшівской універзіты в Пряшові. Проф. Шворц ся у свої професії занимать господарьсков і політічнов історіов Чеськословеньска із орьєнтаціов на її соціалны і народностны неприязны резултаты, дале на проблематіку історії Підкарпатьской Руси в роках 1918 – 1946, середнёевропску історію 20. стороча з орьєнтаціов на народностну проблематіку, етноідентіфікачны процесы і церьковну історію. Темі Підкарпатьской Руси присвятив дакілько своїх публікацій. В рамках свого реферату слухачам принїс много інтересных інформацій з архівных документів, ід якым ся при своїх выскумах дістав. Приближыв з якыма концепціями повойнового ушорїня теріторії Підкарпатьска Русь робили русиньскы представителї, з кым і на якых уровнях о тій проблематіцї діскутовали. Треба повісти, же історічны темы суть все актуалны і все повны новых інтересных інформацій.

На конець были Мґр. Валеріём Падяком, к.н. курто представлены найновшы публікації з карпаторусиністікы, котрых од остатнёй презентації вышло немало. З одборной літературы міджі нима были напр. высокошкольскы учебникы выданы Інштітутом русиньского языка і културы, найновшы словникы Ю. Чорія, ці русиньско-славяньскый лексікон М. Алмашія. З красной літературы были міджі іншыма представлены і дві публікації про дїти, якы того року выдала Академія русиньской културы.

Цїлый семінар і заключну діскузію традічно вела ПгДр. Кветослава Копорова, ПгД., котра авізовала і далшый семінар карпаторусиністікы на 11. новембра, на якый Вас сердечно позываме. Темов семінара буде поставлїня Русинів на Українї.

Мґр. Зденка Цітрякова,

ІРЯК-ПУ, фоткы автокы.