18. научный семінар карпаторусиністікы
з Др. Оленов Дуць-Файфер

21. фебруара 2012 ся в засїдалнї деканкы Факулты гуманітных і природных наук Пряшівской універзіты в Пряшові одбыв 18. Научный семінар карпаторусиністікы, орґанізованый Інштітутом русиньского языка і културы. Быв то першый семінар орґанізованый в роцї 2012, т. є. в зачатім четвертім річнику довгодобого проєкту ІРЯК ПУ. Почас якых ся презентують выслїдкы карпаторусиністічных бадань домашнїх і загранічных ученых.

Темов семінара были Резултаты етнічного руху Лемків у Польщі на зачатку ХХІ. стороча. З рефератом на дану тему выступила вызначна представителька лемківской културы, літературы, освіты і народноідентіфікачного процесу по роцї 1989 – Др. Олена Дуць-Файфер з Інштітуту выходославяньской філолоґії Яґелоньской універзіты в Кракові. Семінар вела  ПгДр. Кветослава Копорова, асістентка ІРЯК ПУ, котра у вступі гостя привітала і представила єй професіоналну біоґрафію.

Реферуюча высвітлила історічный контекст і ёго впливы на сучасный став народностного жывота і народноідентіфікачного процесу Лемків у Польску.

Лемкы не мають свою політічну  партію, котра бы обгаёвала їх інтересы в парламентї Польской републікы, ани не мають достаток сил на єй створїня.  Але мають много сполків, што мож обдивляти, кідь береме до увагы факт, як суть Лемкы в Польску розметаны на вшыткы бокы. Но і так были способны выбудовати функчны орґанізації, котры суть актівныма при захованю і далшім розвитку лемківской културы.

Міцно інтересна тема, о котрій бы ся дало довго бісїдовати, но нажаль каждый семінар є лімітованый часом. Самособов, участници семінара дістали простор на вопросы а потім, як традічно, наслїдовала презентація найновшых русиньскых публікацій. Представлены были нелем публікації выданы на Словеньску (напр. Русиньскый літературный алманах, поетічна збірка Мої сны Юрка Харитуна і др.), але Др. Олена Дуць-Файфер принесла представити і лемківскы найновшы выданя,а  то як научны публікації, так і публікації красной літературы. Про штудентів-русиністів была участь на семінару хосенна іщі з єдной прічіны. Мали  можность спознати вызначну особность лемківского русиньского руху і высокошкольску учітельку – русиністку. Посередництвом прямых контактів з такыма ученыма можуть лїпше вырїшыти о своїй далшій пути в карпаторусиністіцї, наприклад о єдносеместралнім перебываню або і в рамках докторандьского штудія на Яґелоньскій універзітї в Кракові.

Зденка ЦІТРЯКОВА, штудентка русиньского языка і културы ПУ