14. научный семінарь карпаторусиністікы

30. марца 2011 Інштітут русиньского языка і културы Пряшівской універзіты в Пряшові в засїдалнї Ректорату ПУ зреалізовав уж другый тогорічный научный семінарь карпаторусиністікы (од зачатку орґанізованя проєкту, од року 2009, то быв  уж 14. научный семінарь), а то на актуалну в тот час тему: Політічны партії в народнім русї карпатьскых Русинів, із котров выступив ПгДр. Станїслав Конєчні, к. н., історік Сполоченьсконаучного інштітуту Словеньской академії наук в Кошіцях. (Інтервю зо С. Конєчным буде опублікованe в Русинї 2/2011).

Научны семінарї карпаторусиністікы мають  своїх стабілных навщівників. Дакотры з них сі выберають конкретны темы з істых областей жывота Русинів, іншы приходять на каждый семінарь. Самособов, міра навщівности залежить і од особы выступаючого, од ёго способности здобыти приязень слухачів, од  способу, якым докаже подати тему. Доктор історічных наук Станїслав Конєчні є такым професіоналом, котрый і наперек высокому, прісно научному штілу, в котрім робить свої рефераты, докаже дану тему „перетлумачіти“ простым, некомплікованым штілом, также ёго выступы ся все тїшать популарности. Заєдно треба сконштатовати, же народностныма меншынами (в першім рядї Русинами) ся у своїм професіоналнім жывотї занимать скоро 30 років, што ґарантує солідный перегляд з даной проблематікы.

З высше спомянутых прічін семінарь з доктором Конєчным быв інтересный і богатый на діскузію, принїс много новых знань тым, котры на нїм взяли участь.

К. К., фоткa: З. ЦІТРЯКОВА