13. Научный семінарь карпаторусиністікы

 Презентація русиньскых книг выданых в роцї 2010

На 12. годину 14. фебруара 2011 в засїдалнї Ректорату Пряшівской універзіты в Пряшові Словеньска асоціація русиньскых орґанізацій (конкретно єй членьскы орґанізації: Русин і Народны новинкы, Академія русиньской културы в СР, Сполок русиньскых писателїв Словеньска) і Інштітут русиньского языка і културы ПУ приправили святочну презентацію публікацій в русиньскім языку выданых в роцї 2010, споєну з передаванём цїн з Літературного конкурзу СРПС за рік 2010.

На зачатку святочну атмосферу акції спестрив спів популарной інтерпреткы русиньскых народных співанок Марії Мачошковой в допроводї гры на акордеонї Йозефа Пірога. Потім директорка ІРЯК ПУ доц. ПгДр. Анна Плїшкова, ПгД., привітала участників акції (было їх высше 50), орґанізованой в рамках 13. Научного семінаря карпаторусиністікы, і отворила презентацію, в ходї якой представила і два научны зборникы, выданы інштітутом – Studium Carpato-Ruthenorum – Штудії з карпаторусиністікы 2010 (зоставителька К. Копорова) i Русиньскый язык на Словеньску 1995 – 2010 і сучасна русиньска література (зоставителька А. Плїшкова). З  далшым приговором выступив шефредактор редакції Русин і Народны новинкы Мґр. Александер Зозуляк. Представив учебникы і книжкы выданы редакціов Русин і Народны новинкы і Академіов русиньской културы в СР. У вступі выступила тыж председкыня СРПС ПгДр. Кветослава Копорова, яка представила публікації выданы сполком писателїв.

Потім были прочітаны рецензії на выданы публікації і представлены їх авторы. Як перша выступила із рецензіов на зборник поезії про дїти і дорослых авторкы Іветы Мелничаковой з Міджілаборець під назвов І Янкови, і нянькови Мґр. Івана Джундова, ПгД., одборна асістентка Інштітуту русістікы, україністікы і славістікы Філозофічной факулты ПУ. Другу рецензію прочітала ПгДр. Марта Бенькова, ПгД., асістентка ІРЯК ПУ, автором котрой быв доц. ПгДр. Петер Каша, к. н.,таксамо  з ІРУС ФФ ПУ. Была то рецензія на двоязычну книжочку баёк Миколая Ксеняка Зеркалїня. Далшов была рецензія доц. ПгДр. Петра Кашы, ПгД., котру прочітала Івана Джундова, а то на книжку Юрка Харитуна – Мої жалї. Рецензію на научно-популарну публікацію історічного характеру – Ґрекокатолицькый священицькый род Павловічовых із Шарішского Чорного (1693 – 1900) автора Інж. Рудолфа Павловіча прочітав ПгДр. Михал Мурцко, Др. Кветослава Копорова прочітала рецензію на книжку Думкы і тужбы своёй родачкы Кветы Мороховічовій-Цвик. Далшов была анотація зоставителькы Анны Плїшковой на колектівный зборник Русиньскы соловї (Поздравлїня Русинів 1995 – 2000), в якім были опублікованы літературны творы выданы в роках 1995 – 2000 в літературнім додатку Народных новинок – Поздравлїня Русинів. Послїднёв презентованов публікаціов быв Русиньскый літературный алманах на 2010-ый рік, зоставителём якого быв Мґр. Александер Зозуляк. В далшій части презентації ся к своїм найновшым книжкам і творчости высловили самы авторы.

Частёв святочного дня было передаваня цїн з Літературного конкурзу СРПС за рік 2010. Оцїненыма за свої творы были: Юрко Харитун (1. місце), Квета Мороховічова-Цвик і Осиф Кудзей (обидвоє 2. місце) і молодый автор – Петро Ялч (3. місце). Презентація была закінчена автоґраміадов і роздаванём книжок, о якы быв великый інтерес.

Зденка ЦІТРЯКОВА‚ штудентка 2. річника ФГПН ПУ,
комбінації вытварне уменя і русиньскый язык і літературa
Фоткы авторкы