У пятніцю, 29. мая 2025 навщівив наш інштітут доцент Джозеф Еверет (Joseph B. Everett) з Бріґгемской універзіты (Brigham Young University) в штатї Утагу (США) . Є то одборник на ґенеалоґію, ґенеалоґічный і історічный выскум. Інтересує ся о ґенеалоґічне баданя выходной і середнёй Европы (окрем іншого і періоду Австро-Угорьской імперії). Бадателя з америцького контіненту допроводжовав проф. ПгДр.  Ярослав Кушнїр, к. н. директор Інштітуту анґлістікы і американістікы ФФ - ПУ.

Мілых гостїв заінтересовала передовшыткым унікатна Бібліотека карпаторусиністікы і єй публікації, меджі нима ай найновшы выданя з історії (таксамо історії културы) Русинів, дакотры з них планують обїднати про свою бібліотеку, котра фунґує при Бріґгемскій універзітї. Інформації о роботї інштітуту, о Русинах на Словакії і їх новодобім розвитку в періодї третёго народного оброджіня, як ай о русиньскій літературї дали працовници інштітуту – ПгДр. Кветослава Копорова, ПгД., унів. доц. і Мґр. Михал Павліч, ПгД., котрый тыж представив єднотливы тітулы найновшых научных і одборных выдань з карпаторусиністікы, а таксамо курто приближыв розвой сучасной русиньской літературы по роцї 1989. Дакотры тексты сучасной русиньской белетрії (доступны в ПДФ-верзії на інтернетовых сторінках русиньскых обчаньскых здружінь), як приклад хоснованя материньского языка Русинів в літературній сферї, планує доцент Еверет хосновати із штудентами на семінарах і порівновати їх з іншыма славяньскыма языками і літературами.

На фотцї із сыном Джоном Ф. Еверетом, котрый якраз скончів середню школу і планує продовжовати в слїдах свого отця – штудовати історію, а може ся буде шпеціалізовати ай на ґенеалоґію. Віриме, же навщіва інштітуту была ай про нёго іншпіратівнов.

-кк-

Фото: А. Вєтошевова